Sapienti discursi: a clonazione
Dialetto calabrese sanfilese > Giuvann'a suriciara
di Giuvann'a Suriciara (inedito).
- Figlici': su trent'anni ca tiegnu a televisione 'ncasa e de trent'anni a sta rasa, ancòre nun resciu a capire si sugnu ciuotu io o eni iddra ca mi piglia ppe ru culu... è urtimamente senza nemmenu utilizzare mienzi tiermini.
- Papà, l'una cosa, crid'a mmie, nun nega l'autra. Senza ti cria' problemi chiù de chiri chi ti servenu 'ntu portafogliu, cum'ha fattu dopotuttu ppe nna vita, pensa ca tu pue esse ciuotu e c'a televisione ti po' pigliare ppe ru culu senza si nne fare nessunu maraviglia. Ma... dicemi... qual'eni stu fattu ca nun ti quatra?
- Figlici': hannu dittu ca su resciuti certi scienziati senza scienza a culunare l'uomini e mo'... ni trovamu cc'uominu culunati 'ncirculazione.
- Papà...: prima o pue si sapia ca junciamu a su puntu. Ma, ti rifazzu a dumanna: qual'eni u fattu ca nun ti quatra?
- Figlici': a 'mmriga sta 'ntu fattu ca tutti cercanu de 'ntenne chine ponnu esse st'uomini culunati... ppe ri minte mmustra... ppe ri sbri-gu-gna-re. Ohi, fissa! ... ccu ru culu ce sugnu natu io e m'ha seguitu puru tu: vo vide c'ara fine ni fannu cala' e vrache, aru vuòscu ni cce fannu na bella cartulina e na prubbicanu supra tutti i jurnali du munnu? ... e cchine mu duna cchiù a mie lu stòmacu de caminare ppe re strade de Santu Fili ccu ra gente chi mi ride d'arrieti diciennu: "guarda nu pocu, sta passannu chiru ch'eni natu ccu ru culu".
- Papà, nun ti spagnare ca chiru culu luordu chi ti puorti appriessu un tu tocca nessunu e a nessunu scemu li vene a voglia de tu futugrafare... tranne ca nun fuossi scemu almenu u dùppiu de tie. Eppue si dice clonato e non culunatu, e su 'mmuolicu s'appellu clonazione e non certamente culunazione... ca si jamu appriessu a ttie... 'nnestr'ara nazione di nuciddri americani, di fichi d'India e du bbene chi ti vo pigliare u cchiù tardu pussìbul'aru cirvieddru... ni trovamu puru ccu ra nazione di culi aru vientu.
- Veramente, figlici', e tu ti nne facissi maraviglia? ... cumu si vide ca 'ngiugrafia va nu pocu a rilientu. Unn'eni forse veru ca c'eni a nazione du Culuradu? ... e s'eni u veru, ppecchì nun ce potissi esse puru chira du Cularuvientu? ... nu sulu dubbiu avissi io: cchi bannera ci avissimu de dare?
- Chira da pesta chi ti vegna, papà! ... a clonazione, a de sapire, eni nu modu ppe fare figli senza fare figli...
- Juga': u vi ca ra fine a fricatura c'era!
- ... ohi pa', mu fa finì u discorsu... senza sta sempre a rape vucca a strusciu d'acqua? ... li scenziati piglianu na cellula de lu cuorpu umanu...
- ... figlici': e già mi 'mmaginu de duve a piglianu sta cellula.
- Paaapà! ... dicia ca li scenziati piglianu na cellula de lu cuorpu umanu, a trattanu 'n laboratoriu e fannu n'uominu uguale a chiru chi l'hannu pigliatu a cellula. Hannu clonato chir'uominu, si dice.
- Figlici', mo' 'ntennu ppecchi l'uomini d'oje un siti chiù cumu chir'e na vota. Nui i figli, magari nun sempre assimigliavati ari patri chi si trovanu all'anagrafe, ma vi faciamu ccu na tecnica na 'nticchia diversa... na tecnica chi ni l'aviamu 'mparata guardannu all'animali de la fatturia... e chi nu cretinu de maestru ha cercatu de ni spiegare ccu ra storia de l'apa e du juru...
- ... e vui nun ci aviti capitu nente! Veru, papà?
- ... ddruocu tieni ragiune, supra sta storia cce capitu pocu e nente.
- Cumu aru solitu, papà.
- ... e si bravu tu, figlici'. Ma... scusa nu pocu... tu ci la mai vistu fare a n'apa? ... u maestru sembra de si. Figlici': eppue ccu nu juru... povareddra chira apiceddra c'unn'ha trovatu nu pari ad iddra ppe fare certe cose. D'autru cuntu, siccome u juru è nu luordu e ttene nu pistiddru chi è cchiu gruossu de tuttu u riestu misu 'nsiemi (chissu u maestru ni l'ha fattu vide 'nfutugrafia...)... stu juru parte da 'dea c'ogne bucu e purtusu e pocu si nne cura de si circa' na beddra jura... ca puru na povar'apiceddra pe iddru va bona.
- Papà, lu juornu ca tu capisci 'ncuna cosa... mannami chira cartulina c'hai dittu supra... ca mi fazzu prievite.
- Ppecchì, figlici', forse nun si capiscìa miegliu lu discorsu si lu maestru ni portava a vide cumu facia a mamma de Spiffereddra, a jencareddra nostra, ccu Leonzio u toru de zu Ruggeru? ... e nun c'era bisuognu mancu de microscopi e de spiegazioni, ppe capire 'stu fattu.
- Papà, ma cu tuttu stu giru de parole... adduve vorra jire a vatte puru sta vota.
- Figlici', viju ca 'ncigni a capire finarmente 'ncuna cosa. Ti vuogliu fa capire ca ppe jire supra a Luna e supr'a Marte, si stannu faciennu n'cientu pe ni fa scurdare cumu si sta' buonu supra la Terra... e chiru chi chiù c'eni de bellu...
- Papà, na partita aru flipper?... l'urtimu videojuocu ccu Tommasina Rider?
- Figlici', dopu sta dumanna, 'ncignu a cumprenne' ppecchì hannu dovutu culunare l'uomini. Bestia ca nun si avutru: parlu de na bella mangiata dopu na jurnata de lavuru e na menzura passata 'ntru liettu ccu muglierta... chi ti fannu dimentica' cchi schifu è stata la jurnata stessa. Oji (guardati 'ntuornu)... pinnuli, mangiari senza sapuri, provette, culunati... e tutti segajuali scunsulati. Cchi schifu de munnu chi mi vorranu fare tariffare. Ma tu ti ci truovi buonu: chistu e lu munnu tue! ... e a tie, ti dicenu puru ca stannu trovannu nu metudu ppe ti fa campa' mill'anni n'salute: figlici', nun ti 'mmidiu.
- Papà, puru oji m'a dovutu ruvin'a jurnata.
- Eppue, figlici', è chiù giustu cumu dicu io: culunati e non clonati... e sugnu sicuru ca puru li scenziati volianu dire la stessa cosa mia. Dopututtu nessunu ti po' dire, nè ti lu dirannu mai, si la cellula c'hannu utilizatu ppe futucupiare a cchiru fissa ca nun li tirava... fuossi stata de la vucca o de lu grupu de lu culu sue... e si unu nasce de na cellula de nu grupu de culu... ppe forza culunatu l'a de chiamare... e spera ca quannu ti cce mitti a parlare n' frunte... tra na parola e l'autra nun l'esce puru ncunu piritu de la vucca.
- Papà, e tu cchi suluzione prupunissi?
- Figlici': ca senza rinegare lu prugriessu giustu, si riturnassi a la genuinità de la vita de na vota. Ca s'utilizzassinu li studi e l'esempi giusti, e no ca ppe fa capire cumu nascenu li figli a li figli tui ce, puortu l'esempiu de n'animale ccu na chianta... ca si io 'nvece de jire ccu mammata jia a ru liettu ccu nu cavulu o na scarola, statti sicuru ca nun nascia na cima de rapa ccu due zampe cum'attie... e magari io, 'ntru canciu, ce guadagnava puru 'ncuna cosiceddra. E mo'... va puru a ti fa prievite, ccu ra benedizione mia... ca puru senza fare figli, ddra patre t'hau de chiamare.